Vit svara alt
samdøgrið

HVAT ER HEILBRIGDI?

Heilbrigdi er ein viðgerðarstovnur, sum síðani 1986 hevur viðgjørt alkoholikarar og aðrar rúsevnismisnýtarar eftir tí sonevndu Minnesota-fyrimyndini ella Minnesota-skránni.

Viðgerðarhátturin á Heilbrigdi er mentur í USA og síðani tillagaður í Ísland, haðani hann er komin til Føroya.

Takkað verið viðgerðarhátti AA-felagsskapsins, tí sonevndu Minnesota-skránni, hava fleiri milliónir fólk lært at vera edrú uttan nakran heilivág.

Royndir kring allan heim vísa, at bæði fyri tey, ið eru betur fyri, og fyri tey mest óhepnu eru úrslitini av viðgerðum eftir Minnesota-skránni sera góð samanborið við aðrar viðgerðarhættir, og er hesin eisini sera væl egnaður til heildarviðgerð av bæði misnýtarum og avvarðandi.

Í heimshøpi er Minnesota-skráin helst tann mest nýtta, tá tað snýr seg um viðgerð fyri misnýtslu av rúsevnum. Man roknar við, at í dag eru uml. 150.000 AA bólkar við yvir 2 mió. aktivum limum.

Grundhugsanin í Minnesota-skránni er, at tað eru royndirnar hjá fyrrverandi misnýtarum, sum skulu hjálpa øðrum at sleppa burtur úr bundinskapinum. Tí eru misnýtsluviðgerðarnir á Heilbrigdi eisini fyrrverandi misnýtarar.

Men viðgerðin fer tó fram undir neyvum læknaligum eftirliti, og allir sjúklingar verða kannaðir og innlagdir av yvirlæknum á Landssjúkrahúsinum í Havn.

Teir fyrstu 7-14 dagarnar verður misnýtarin aveitraður undir serkønum eftirliti av lækna og sjúkrarøktarfrøðingi.

Samstundis verður misnýtarin heilsukannaður, soleiðis at ein fullfíggjað heilsumynd kann fáast av honum.